Folixa’l Centenariu
Cien años de La Benéfica, un día pa nun escaecer
Nun paramos de celebrar.
Cien años, cien. L’Antiguu Teatru de La Benéfica de Piloña lleva un sieglu en pie, vivió una guerra, una reconversión industrial, pasaron per ella munchos coches (foi garaxe tamién), celebráronse funciones, asamblees, bailles, debates y toa clase d’enguedeyos creativos. Y claro, una fecha asina nun se pasa per alto con un cortáu y una palmera chocolate. Celebrámoslo como toca: con folixa, con música, con comida, con karaoke y, pa rematar, enterrando una cápsula del tiempu pa les futures xeneraciones de folixeros y folixeres.
El 6 de xunu ye’l día. Pon l’alarma.
El programa, pa que
nun tengas escusa
10h a 13h — Taller: Pa escribi-y una canción a La Bene, con Lo fácil
Entamamos el día zarrando los güeyos. Lliteralmente. El colectivu Lo fácil — parte de la programación Oyíos Sordos de Radio Barullu — propón un taller nel que vamos escuchar l’espaciu de La Benéfica de verdá: les sos testures, les sos voces, les sos pantasmes (¡criatures de resistencia!). Xuntos, vamos convertir esos sones y recuerdos n’instrumentos pa escribir-y una canción al teatru. Taller de baldre con inscripción. .
13:30h a 15:30h — Xinta Popular y Concursu de Comíes del Pasáu y del Futuru
Sí, hai concursu de comida. Y sí, hai premios. Trai un platu inspiráu en tiempos pasáos o nel futuru, el xuráu va valorar la puesta n’escena. La xinta popular va ser el momentu perfectu pa sentase, comer bien y bilordiar con tol vecindariu.
15:30h a 17:30h — ¡Ven Kantar! Karaoke con temazos de tolos tiempos
Nun da más si cantes bien o fatal. Nun da más si escueyes Resistiré o Gasolina. Lo qu’importa ye que te llances. El karaoke ye pa tol mundu, y los temazos van d’ayer pa hoi.
17:30h a 19:30h — Una cápsula del tiempu pa 2050
El platu fuerte del día: enterramos una cápsula del tiempu pa que daquién la abra en 2050 y descubra qué pasaba na Benéfica en 2026 y qué-y deseamos pal futuru. Una manera bien guapa de pensar nel futuru dende un espaciu que yá tien cien años de historia.
Dempués d’enterrar la cápsula — ¡Pa La Traviesa a ver a PVXARRA!
Si dempués de too esto, te queda enerxía, vas necesitala. Zarramos el día na Cervecería La Traviesa con PVXARRA en directo. El final perfectu pa un día de los que dan ganes de contalo.
¿Por qué ye especial?
Porque ye una programación pensada dende’l pueblu, pal pueblu. Nun hai escenarios inalcanzables nin carteles de grandes estrelles. Hai vecines y vecinos, alcordances, comida, música y un teatru que lleva cien años habitando Piloña.
Ven. Trai a quien quieras. Y si puedes, trai daqué pa’l concursu de comida.
¡Hasta’l 6 de xunu! 🎉
