Creamos un Monstruu
PRESENTACIÓN
DE PROYECTOS ARTE+EDUCACIÓN
INFO PRÁCTICA
Fecha: Sábadu 13 de xunu, de 11h a 13h
Lugar: Parque Ferrera d’Avilés
Entrada: De baldre hasta completar aforu
¿CÓMO QU’UN MONSTRUU?
Sí, dende La Benéfica de Piloña creamos un monstruu. Y encántanos.
Esto ye lo que pasa al xuntar una bienal institucional impulsada dende la ciudá con un centru cultural comunitariu asitiáu nun pueblu, al trabayar con tres escueles rurales y tres artistes asturianes de diverses disciplines y, amás, facer proyectos d’arte+educación dende la radio. Si esto nun ye una monstruosidá, que resucite Mary Shelley y lo vea.
Esti monstruu, un pocu frankenstein, un pocu esperimental, fórmenlu partes de diferentes cuerpos y realidaes. Igual nunca se vio una cosa asina y puede qu’a delles persones-yos dea mieu. Pero esti monstruu, anque nun s’entienda, tamién escuende muncha belleza.
ESTI YE’L NUESTRU MONSTRUU
Nesti añu, en collaboración cola Bienal Climática d’Avilés, desenvolvimos tres proyectos d’arte+educación en centros educativos públicos de primaria y secundaria de Piloña y Cabranes. Trabayamos col profesoráu y l’alumnáu alredor de temes vinculados a la crisis climática y nos visitaron artistes que nos ayudaron a pensar, xugar y crear dende l’arte y la imaxinación.
Préstanos pensar les escueles como centros culturales, quier dicise, espacios nos que tamién podemos crear y participar de la vida cultural. Les infancies y adolescencies tienen muncho que dicir y aportar sobre los retos contemporáneos. Amás, la escuela, y sobre too, la escuela rural, ta perconectada col territoriu qu’habita, daqué fundamental a la hora de falar sobre crisis climática. La crisis climática ye, porriba de too, una crisis ecosocial, y la escuela puede ser esi espaciu nel que volver a conectar cola contorna, y facelo dende una mirada crítica y artística.
Les clases de 4º, 5º y 6º de primaria del CRA La Coroña escribieron radioficciones inspiraes n’espacios industriales abandonaos de Piloña. L’artista Alba Matilla ayudónos a conectar estos paisaxes industriales con seres de la mitoloxía asturiana y retos de la crisis climática.
La clase de 5º de primaria del CEIP L’Ablanu creó un xuegu cooperativu de cartes cola artista Raposu Roxu llamáu ¡GUACAMOLE! pa pensar sobre cómo nos relacionamos cola naturaleza col xuegu simbólicu. Al final, escribimos y grabamos poemes inspiraos nel día a día de la vida de ciertos animales.
La clase de 1ºESO del IES Infiesto creó una ficción sonora alredor del maíz, los usos, oríxenes y la relación cola fiesta tradicional del Antroxu, pa reforzar los vínculos de la escuela con esta tradición. L’artista Sara García ayudónos a repensar la nuestra relación cultural y simbólica col maíz, creando máscares de personaxes feches con elementos d’una panoya.
De too esto y más ye de lo que vamos falar el próximu sábadu 13 de xunu de 2026 nel Parque Ferrera d’Avilés, nun programa especial de Radio Barullu, la radio de la Benéfica de Piloña, pa presentar al públicu estos tres proyectos d’arte+educación. Vamos contar con artistes, profesores, alumnáu y responsables de la Bienal pa reflexonar sobre monstruos, el valor de la educación artística y la importancia pa facer frente a desafíos como la crisis climática. Esti programa especial cuenta cola collaboración de Radio Kras.
La entrada ye de baldre hasta completar aforu. ¡Esperámoste!
