Oyíos Sordos
OYÍOS SORDOS, FORMACIONES
EN PODCAST Y ARTE SONORU
FACER OYÍOS SORDOS
¿Prestaríate facer radio y crear el to propiu podcast? ¿Interésate la música, lo sonoro y l’arte?
Dende Radio Barullu presentamos OYÍOS SORDOS, un programa de formación p’aprender a crear guiones de podcast y esperimentar col arte sonoru. Ente xunu y xunetu vamos facer dos ciclos de talleres en La Benéfica de Piloña y en La Maléfica con diferentes artistes del panorama asturianu pa esperimentar, probar per primer vez o afondar no que yá sabes.
En vez d’inorar o nun facer casu, con esti programa d’OYÍOS SORDOS queremos poner l’atención naquelles coses que solemos pasar por alto, escuchar los detalles, conocer les histories que tán nuna frecuencia casi imperceptible y amplificar y poner en colectivu ferramientes y aprendizaxes.
CICLU DE GUIÓN PA PODCAST
Nesti taller vamos poner enriba la mesa les ferramientes pa escribir el guion d’un podcast dende la idea inicial hasta la despedida final. Vamos trabayar la diferencia ente escaleta, guion lliterariu y guion técnicu pa dar orden, ritmu y naturalidá a cada episodiu. Vamos ver cómo captar l’atención dende la introducción, caltener l’interés nel desarrollu y zarrar con personalidá.
20 places. >>> Inscripciones <<<.
Podcast 360: conceptu y desarrollu. Con Sergio Dosal Miércoles 17 de xunu. 17h a 20h. chigre La Maléfica .
Nesti taller vamos aprender a conceptualizar diversos intereses nun formatu auditivu y sonoru. Vamos descubrir temes que conecten coles nuestres personalidaes, vamos da-yos forma y conocer cómo llevalos a un formatu de podcast dende cero.
20 places. >>> Inscripciones <<<.
Escribir pa falar: taller de radioficción. Con Xaime Martínez Sábadu 4 de xunetu. 11h a 14h. Chigre La Maléfica.
Nesti taller prácticu vamos aprender los conceptos básicos de la escritura creativa -estructura, procesos, técniques…- y cómo aplicalos a un tipu mui concretu de creación: el guion de radioteatru y podcast de ficción. Al final del cursu vamos tar un poco más cerca de contar histories de ficción ente medies de les voces de los protagonistes.
20 places. >>> Inscripciones <<<.
CICLU D'ARTE SONOROU
Pa escribi-y una canción a La Bene. Con Lofácil
Sábadu 6 de xunu. 10h a 13h. La Benéfica de Piloña.
Esti taller propón un alcuentru a distancia d’abrazu nel que, al zarrar los güeyos y escuchar fondamente, vamos poder sentir y esplorar les testures, los colores, voces y pantasmes (¡criatures de resistencia!) qu’habiten l’arquitectura sonora de La Benéfica de Piloña. En comuña, vamos tratar de detectar y rexistrar los elementos que la integren, pero tamién los recuerdos y fragmentos sensoriales aportaos por quien nos acompañe y tresformalos n’instrumentos que, nesi momentu y habitando esi llugar, va permitinos principiar a escribi-y una canción a La Benéfica de Piloña.
15 plazas. Actividá ta vinculada al Centenariu de La Benéfica de Piloña.
Mapa sonoro de L’Infiestu. Con Juanjo Palacios
Sábadu 4 de xunetu. 18h a 20h. La Benéfica de Piloña
Esti taller propón l’entamu d’una cartografía sonora de L’Infiestu: una invitación a descubrir el territoriu cola escucha atenta, dexándose empobinar polos soníos que lo habiten. A lo llargo de l’actividá, les persones participantes van aprender a reconocer, rexistrar y documentar el paisaxe sonoru, esplorando la contorna dende una
escucha sensible y consciente. Les grabaciones realizaes van pasar a formar parte del mapa, contribuyendo a la construcción colectiva d’un archivu vivu que recueye, preserva y pon en valor la identidá sonora del llugar.
20 places. >>> Inscripciones <<<.
Impulsu invisible. Taller de música electrónica. Con DJ La Güeriata
Vienres 10 de xunetu. 17h a 20h. La Benéfica de Piloña.
¿Dalguna vez t’entrugasti qué ocurre realmente de la que baillamos música electrónica? Esta esperiencia propón un recorríu inmersivu polos xéneros de la electrónica — pasando per soníos híbridos y esperimentales— dende la esperiencia corporal y emocional. Vamos esploraremos cómo’l ritmu repetitivu xenera estaos de conexón y presencia al traviés del BPM (beats per minutu) y el warm up o calentamientu, dos ferramientes esenciales dientro d’un set.
30 places. >>> Inscripciones <<<.
¿CÓMO PUEDO APUNTAME?
Puedes apuntate a los dos ciclos, a un solo namás o a talleres concretos. Solo Namás que rellenar el formulariu de cada taller al que quieras asistir. Ponémonos en contactu contigo pa confirmar la plaza. Por favor, si finalmente nun puedes venir avísanos pa que podamos asignar la to plaza a otra persona.
Tolos talleres son de baldre y pa tolos públicos. Edá recomendada: a partir de 14 años.
