Crónica Bachatéu
¡Qué atrevimientu ye’l míu!
¡Poneme yo a falar de bachata!
Yo, qu’hasta fai bien poco nun sabía estremar la bachata de la cumbia,
nin el merengue del chachachá…
Esa yera la mio triste realidá hasta’l pasáu domingu 26 d’abril,
cuando na última velada de “Así se Baila”, Sergio Aragón y Aitana Rodríguez
lo petaron col taller de bachatéu qu’impartieron na Benéfica.
Aitana y Sergio, mui mozos ellos, pero yá con una llarga trayectoria de bailles llatinos a les espaldes, deprendiéronnos delles figures y pasos d’esti baille dominicanu, amestando versiones más tradicionales cola bachata moderna y la bachata sensual (que son fórmules evolucionaes de la clásica).
Anque’l taller yera pa principiantes, veíase xente mui avezao nel tema que, más tarde y cola maraviyosa DJ colombiana Flamma Rosa, amosaríen tolos sos saberes, non yá nel bachatéu, sinón con salsa, cumbies y demás ritmos sabrosones del otru llau de la mar.
Foi una gociada ver cómo baillaba xente con xeitu como l’holandés Klaas, de Biedes, Fernanda, d’Uviéu, Dani, Eva o demás persones que s’averaron a baillar dende’l conceyu llaniscu, Xixón, Nava y otres zones. Toos ellos aseguraron pasar una tarde bien prestosa, que, amás, rematóse cola tradicional rifa d’una cesta que, nesta ocasión, traía productos gourmets de Celedonio y unes impresionantes botelles de Martini, de los años 50, donaes pola Posada de Barru. Agradecidísimes a toos ellos.
Pa repitir. Y naguando yá pol prósimu “Así se Baila”.
Crónica ¡Así se baila! Especial Bachatéu
del 26 d’abril por Bea G. Doral
*Esta crónica ta escrita n’asturianu y nun na
versión castellana por respetar la versión orixinal”
