Si esto foi’l 99…
NUN PUEDES PERDETE EL 100
Un cabaré qu’acaba con un banderolu de Puxa Piloña saliendo, allegedly, de la pesetina de la stripper Úrsula Martínez nun pudo defraudar… y sabéislo. Asina foi, en realidá, tola xornada del 99 aniversariu de La Benéfica… ¡Una fantasía! Que yo a veces véome parada en mediu la cai, mirando al infinitu y pensando: “Pero esta xente… ¿qué pesetina van facer pal 100 aniversariu? Ardo en deseos de saber”.
El centenariu yá llegará; lo que toca agora ye falar del que vivimos el pasáu 17 de mayu en L’Infiestu. Mio güela diría: “Foi mui gordu”.
Too empezó cola inauguración oficial de ROMEMORIA, el mural que’l Colectivo Berde, baxo la dirección de Robert Waters, fixeron coles persones usuaries de la Residencia d’Ancianos de L’Infiestu y el guah.eríu del IES. Una obra preciosa fecha cola técnica de la cinotipia que lluz yá pa siempres nel teatru y que foi testigu de tolo qu’asocedió dempués. Qu’a ver cómo vos lo resumo…
Pilar Sánchez Vicente, Rodrigo Cuevas y Arantza Margolles fixeron que tol respetable s’enamorara de “La Asturianita”, la protagonista (real) del últimu llibru de la escritora xixonesa. “Una artista que nun tien brazos nin los necesita”, dicíen los cartelos qu’anunciaben los shows de la de L.luarca ellí pelos entamos del sieglu XX. Y según entamó’l sieglo XXI, vieno’l DJ francés Pascal Kleiman a demostramos na sesión vermú del Día Grande de La Benéfica que la frase sigue siendo cierta. Cuando vos digo que, cola so sesión pinchada colos pies, Kleiman fixo baillar hasta “al apuntador”, nun ye una llicencia lliteraria por eso de que tábemos nun teatru, non. Prométovos que foi asina. Too’l mundu bailló con ganes.
Un anticipu de lo que pasaría pela nueche, cuando se zarraron les puertes y les contraventanes d’un teatru nel que nun cabía nin un corazón más por esplosionar. Ye que… ¿Cómo vos lo esplico pa que sintáis la contundencia del plan? Los Black Clovers, con Elías y Emma a los micrófonos, tan pronto nos punxeron a cantar pola Jurado como a baillar I Will Survive; el teatru de El Curro DT y Trivilorio Impro dionos les rises más franques de la nueche; el remangu de Lady Llagar y Livianas Provincianas, l’allegría de vivir; y les acrobacies del Nuevo Fielato, la maxa. Anque, pa maxa, la que me tien falando sola dende’l día 17: lo del tesorín d ’Úrsula. Yo, personalmente, namás pienso nel 100 (y lo que venga primero, claro).
