Relatoría Per Caleyes y Senderos II
Una relatoría pa pensar el
trabayu cultural nel rural asturianu
Del 10 al 12 d’abril del 2026, La Benéfica de Piloña acoyó la segunda edición de les Xornaes Per Caleyes y Senderos, tres díes dedicaos a pensar la diversidá de la cultura dende los pueblos. Museos etnográficos, festivales independientes, asociaciones vecinales, artistes, artesanes, centros sociales autoxestionaos y negocios culturales compartieron sofá, caleya y mesa de debate pa entrugase mutuamente cómo ye, na práctica, facer cultura nel mediu rural asturianu.
Pa que les xornaes nun quedaren namás na memoria de quien participó, una relatora tuvo tres díes recoyendo los temes, les voces y les entrugues abiertes que dexaron les xornaes. Ponémosla a disposición, en descarga llibre, de quien nun pudo asistir y de tol sector cultural asturianu, cola idea de que sirva como puntu de partida pa siguir pensando en colectivo.
A lo llargo de les xornaes sucediéronse distintes dinámiques: los diálogos de Cruces, que sentaron nun mesmu sofá a proyectos de naturaleza bien distinta; Al Debalu, una deriva caminando per L’Infiestu pa pensar sobre la definición de cultura; el taller «Artista de día, autónoma de noche» con Ramona Cueto, sobre fiscalidá, contratación y formes xurídiques; y En la Encrucijada, un espaciu d’alderique abiertu ente axentes institucionales y independientes que zarró l’alcuentru, yá en clave de descansu colectivu, cola performance sensorial «De la siesta a la fiesta».
D’esos tres díes surdieron munches idees y entrugues que traviesen al sector: la descentralización y los nuevos mapes culturales, la tresmisión interxeneracional del patrimoniu inmaterial, la precariedá estructural y les microeconomíes que sostienen los proyectos, la rellación —dacuando tensa, dacuando necesaria— col territoriu y coles instituciones, o la urxencia d’una organización colectiva del sector, daqué que cobra especial sentíu de cara a la futura Llei de Cultura d’Asturies.
Si t’interesa comentar dalgún tema en particular, siempre pues ponete en contactu con nós en hola@labenefica.org.
Estes xornaes son parte del proyectu “Xornaes Per Caleyes y Senderos, Segunda Edición”, financiáu pol Ministeriu de Cultura y Deporte, nel marcu de les Ayudes pa l’Acción y Promoción Cultural de 2025.
