Magüestu n’Antrialgu 2026
El Magüestu de La Benéfica
treslládase a Antrialgu
Llega payares y, con él, la golor a castaña asao. Esti añu’l Magüestu de La Benéfica fai les maletes y treslládase a la parroquia d’Antrialgu, onde vamos celebralu’l domingu 1 de payares en collaboración cola Xunta Vecinal. Va ser una xornada pa xuntanos alredor de la castaña, la sidra del duernu, la música, el baille y los cuentos de siempre. De baldre y pa tolos públicos.
Igual vos llamó l’atención el nome: esti añu escribimos «Magüestu», la forma propia de la variedá oriental del asturianu, la que s’usa equí, nel territoriu onde lo celebramos. Y, como siempre, la fiesta nun la facemos soles: amañámosla coles vecines y vecinos d’Antrialgu y col grupu de persones voluntaries de La Benéfica, que lleva dende setiembre dándo-y vueltes a cada detalle.
Calentando motores
en La Maléfica
Resulta que la castaña nun ye namás pa comer. El domingu 25 d’ochobre a les 13:00h, nel Chigre Cultural La Maléfica, Arbio va danos una charla introductoria sobre biomimética siguida d’una demostración en directo de Biocastanar®, un biomaterial fechu a partir de castaña. Arbio ye un proyectu asturianu de diseñu y biofabricación asitiáu nel Parque Natural de Redes, en Lladines (Casu), y pa Biocastanar® utiliza pelleyu de castaña que vienen de residuos locales. Una mirada contemporánea a ún de los frutos que más hestoria guarda nel nuestru territoriu. La entrada ye de baldre.
El domingu 1 de
payares, a Antrialgu
Abrimos la fiesta a les 12:00 asando castañes y mayando sidra del duernu nel momentu, pa repartir ente toles persones que s’averen.
A les 13:00 llega’l vermú, amenizáu pola Bandina Andecha Turcipié, una bandina tradicional formada por componentes de l’Andecha Folclor. Van tocar a les 13:00 y vuelven con un segundu pase a les 15:30, asina que yá podéis dir calentando los pies pal baille sueltu.
¿Tenéis bona mano na cocina? Esti añu volvemos col concursu de comida con castañes, con dos categoríes: dulce y saláu. Recoyemos los platos dende les 13:00 y el concursu va ser a les 14:30.
Pa les neñes y los neños, a les 15:30 na Escuelina d’Antrialgu, Andrea Lobo trai los sos Fechizocuentos: un espectáculu de narración oral n’asturianu con títeres, oxetos y música en directo, pensáu pal públicu infantil y familiar.
Y a les 17:00, el que nunca falla:¡bingu con grandes premios!Tol día va haber amás, xuegos tradicionales, música y baille.
Programa
Domingu 25 d’ochobre· Chigre Cultural La Maléfica
- 13:00 Charra sobre biomimética y demostración de Biocastanar® con Arbio · De baldre
Domingu 1 de payares· Magüestu en Antrialgu
- 12:00 Entamamos asando castañes y mayando sidra del duernu
- 13:00 Vermú amenizáu pola Bandina Andecha Turcipié
- 13:00 Recoyida de platos pal concursu
- 14:30 Concursu de comida con castañes – dos categoríes: dulce y saláu
- 15:30 Fechizocuentos d’Andrea Lobo na Escuelina d’Antrialgu
- 15:30 Segundu pase de la Bandina Andecha Turcipié
- 17:00 ¡Bingo con grandes premios!
Información práctica
- Cuándo:dominuo 1 de payares, dende les 12:00.
- Ónde:Antrialgu (Piloña). La fiesta ye nel prau y los Fechizocuentos, na Escuelina d’Antrialgu.
- De baldre y pa tolos públicos.
- Comida y barraa lo llargo de tola xornada.
- Concursu: recoyida de platos dende les 13:00; concursu a les 14:30.
- Va haber baños portátiles, ún d’ellos adaptáu.
- Charra en La Maléfica:domingu 25 d’ochobre, a les 13:00. De baldre.
De baldre y pa tolos públicos · Música y baille · Xuegos tradicionales tol día · Va haber comida y barra
