La Benéfica premiada pola Fundación Corripio Alonso
La Benéfica de Piloña comparte’l Premiu Corripio Alonso de les Lletres, les Artes y Conservación del Patrimoniu Históricu con Javier Díaz Fernández, tamién conocíu como Javier de Arroes.
Fainos especial ilusión que’l trabayu fechu pa conservar y difundir el patrimoniu y la cultura popular se reconociese, nesti casu, polaFundación Corripio Alonso. Siendo esta la primer edición d’unos gallardones creaos pa reconocer trayectories y iniciatives qu’aporten y promueven llabores sociales, científiques, culturales, patrimoniales y humanístiques en Villaviciosa, Cabranes y Piloña.
L’importe económicu va destinase dafechu a financiar les actividaes culturales de la organización, cubriendo parte de los gastos de personal, artistes y llabores de mantenimientu y rehabilitación del edificiu.
“La Benéfica exerce un llabor destacáu de recuperación del espaciu rural al traviés de l’actividá cultural, col consiguiente impactu na cohesión social”.
Les categoríes y los premiaos colos que compartimos esta primer edición son:
- Premiu Corripio Alonso al Bienestar Social y los Deportes: Asociación Raitana.
- Premiu Corripio Alonso de Ciencies Sociales, Comunicación y Humanidaes: Fundación Foro Jovellanos.
- Premiu Corripio Alonso d’Emprendimientu, Investigación Científica y Técnica:D. Luis Fernández-Vega Sanz.
- Premiu Corripio Alonso de les Lletres, les Artes y la Conservación del Patrimoniu Históricu: Compartimos gallardón con Javier Díaz Fernández, un auténticu archivista popular de la cultura asturiana. Dedicóse per décades -de manera prácticamente artesanal-, a grabar, coleccionar, documentar y preservar la memoria de la tonada, la gaita y los sos protagonistes.
Queremos felicitar al restu de gallardonaos, con un cariñu especial pol llabor que realiza l’Asociación Raitana,acompañando a persones con discapacidá y a les families en Villaviciosa. Ofrez múltiples servicios a la diversidá, xenerando un espaciu d’alcuentru y promoviendo l’accesibilidá y la meyora de la calidá de vida de los usuarios y usuaries.
Vamos alcontranos colos premiaos nel actu d’entrega que va facese’l próximu 2 d’ochobre del 2026 nel Teatru Riera de Villaviciosa.
