Convocatoria Artistes Benéficos 26
CONVOCATORIA ABIERTA
Esposición/Mercáu d'arte nel
Antiguu Balneariu de Borines
Antiguu Balneariu de Borines
Del 31 de xuneru al 6 de setiembre
Dende La Benéfica, abrimos una convocatoria pa escoyer obres que van formar parte d’una esposición colectiva en formatu Mercáu d’Arte que s’inaugurará’l 31 de xunetu del 2026 y va poder visitase de vienres a domingu hasta’l día 6 de setiembre.
El Mercáu enmárcase dientro del nuestru programa cultural como una propuesta que favorez la profesionalización d’artistes al traviés d’un modelu de galería y que les fai más accesibles pa quien vivimos nel pueblu. Presentamos esti proyectu en collaboración con Borines Manantial de Cultura, una iniciativa vecina en Piloña que tien como misión reconvertir l’Antiguu Balneariu de Borines nun espaciu cultural y d’alcuentru.
Nun somos galeristes, pero queremos crear un espaciu galerísticu alternativu nun sitiu tan especial como l’Antiguu Balneariu de Borines, dando espaciu a artistes que nun tienen la oportunidá d’esponer fácilmente.
🧶 Sobre Artistes Benéficos
Artistes Benéficos ye una llinia de trabayu impulsada por La Benéfica dende 2023, que combina visibilizar arte y cooperación nel mediu rural. Amás de ser una esposición colectiva que visibiliza’l trabayu d’artistes actuales nun entornu non urbanu, el proyectu propón una forma d’apoyu mutuu: les obres escoyíes puen vendese, y una parte —o la totalidá, si asina lo decide’l/la artista— destínase como donación pal sostenimientu de La Benéfica como espaciu cultural. Asina, Artistes Benéficos nun activa namás un espaciu espositivu alternativu y accesible, sinón que tamién construye una rede de collaboración ente creadores y comunidá, dende la xenerosidá, la confianza y el deséu compartíu de facer cultura en común.
Sobre l’espaciu espositivu
L’Antiguu Balneariu de Borines, construyíu nel 1892, ye un reflexu de la historia cultural y social d’Asturies. Hasta principios del sieglu XX esti llugar foi un centru d’alcuentru y salú, onde la élite cultural y social se xuntaba pa disfrutar de los beneficios de les agües minero-medicinales del so manantial.
Güei, Borines Manantial de Cultura busca facer del balneariu un espaciu pal diálogu y la creación, pa cultivar la salú emocional al traviés de les relaciones humanes y la cultura en toles disciplines.
🗓 Feches clave
- Convocatoria abierta: del 15 de xunu al de 6 xunetu de 2026
- Comunicación d’obres escoyíes: 10 de xunetu
- Entrega d’obres: Del 13 al 19 de xunetu
- Inauguración de la esposición: domingu 2 d’agostu de 2026
- Horariu del Mercáu d’Arte: del domingu 2 d’agostu al domingu 6 de setiembre del 2026 (Vienres 18-20h, Sábados 11-14h y 18-20h, y Domingos 11-14h).
- Llugar: Antiguu Balenariu de Borines (Piloña)
🎯 ¿A quién va dirixida esta convocatoria?
Esta convocatoria ta dirixida a artistes que la so obra s’inscriba nos llinguaxes pictóricos, escultóricos, testiles o otros soportes físicos fácilmente tresportables y de dimensiones manexables.
Dende La Benéfica entendemos qu’artistes somos toes,dende quien cues botones hasta quien esculpe’l mármol. Nesta ocasión, buscamos perfiles más cercanos al sistema académicu y espositivu del arte.
📩 ¿Cómo participar?
Envía tu propuesta a artistas@labenefica.org cola siguiente información:
- Breve presentación personal/artística (máx. media páxina)
- Imáxenes de les obres propuestes (mínimu 3, máximu 10)
- Ficha técnica de les obres: títulu, técnica, midíes, añu, preciu de venta
- Porcentaxe de donación a La Benéfica de cada obra: les opciones de donación son 50% o 100%
- Indicar disponibilidá pal tresporte dientro de les feches previstes
- L’últimu fin de selmana de la esposición, les obres non vendíes van ponese a metá de preciu. Si nun quisieres participar nestes rebaxes, indícalo na to inscripción.
- Breve presentación personal/artística (máx. media páxina)
📦 Condiciones de participación
- Cada artista establez el preciu de venta de les sos obres.
- Les obres escoyíes van tar disponibles pa la venta nel periodu espositivu.
- En casu de venta, el repartou va ser 50/50 (50% pal/la artista, 50% pal proyectu La Benéfica de Piloña). Si dalguna persona quier donar la totalidá de la obra o una de les obres dafechu a La Benéfica, tien de lo indicar na inscripción.
- El montaxe y diseñu espositivu corren a cargu del equipu de La Benéfica. L’Antiguu Balneariu de Borines ye un espaciu d’interés históricu; nun podemos instalar les obres con perforaciones o modificaciones nes parees.
- El tresporte de les obres hasta’l puntu acordáu ye responsabilidá del/la artista. Van acordase feches y llugares pa la entrega.
- La organización nun se fai responsable de daños o pérdides nel tresporte, polo que se recomienda l’usu d’embalaxes seguros.
- Cada artista establez el preciu de venta de les sos obres.
🖼 Criterios d’escoyeta
- Calidá artística y técnica de la obra
- Coherencia cola llinia curatorial d’Artistes Benéficos y l’espaciu espositivu
- Priorizaremos obres de pequeñu/mediu formatu
- Viabilidá técnica de montaxe y tresporte
- Diversidá de llinguaxes y enfoques
- Cercanía a Piloña o al Principáu d’Asturies del/la artista y la obra
- Capacidá y espaciu: si recibimos más propuestes de les que l’espaciu puede almitir, guardaremos pa futures convocatories les obres non escoyíes
📣 Derechos de difusión
Les imáxenes de les obres va poder utilizales La Benéfica namás pa la difusión de la esposición en medios dixitales, impresos y redes sociales, siempre acreditando a les artistes participantes.
💌 ¡Esperamos la to propuesta!
Si yes artista y quies participar nesta esposición colectiva, mándanos la to propuesta primero del 6 de xunetu de 2026.
Pa cualquier dulda, puedes escribinos a artistas@labenefica.org
