Resolución Arte + Escuela 2026/2027

El llunes 9 de payares zarróse la convocatoria del programa ARTE+ESCUELA, na que recibimos un total de 13 candidatures de centros educativos públicos. Dende La Benéfica tamos mui ilusionaes cola acoyida y col interés amosáu por incorporar proyectos d’arte y educación nes aules.

Prestónos muncho conocer la motivación pa participar nel programa, amás de la cantidá y diversidá de proyectos y iniciatives que yá se tán desenvolviendo nes sos comunidaes educatives.

La selección nun foi fácil. Dempués de valorar les candidatures atendiendo a la motivación del Equipu de Coordinación y del aula propuesta, amás de la esperiencia y trayectoria del centru nel desenvolvimientu de proyectos propios, seleccionamos tres centros educativos nos que se van llevar a cabu los proyectos diseñaos por artistes mozos asturianos pal cursu 2026/2027:

  • CP Matemático Pedrayes (Llastres), onde se va desenvolver Suaños de metal. Mitoloxía y ficción pa entender el mundu qu’habitamos, d’Alba Matilla.
  • IES Infiesto (Piloña),onde se va llevar a cabu Arqueoloxía de la memoria. Una mirada al pasáu dende los oxetos, el paisaxe y la tresmisión, d’Irene Faza.
  • IES Cuenca del Nalón (Llangréu), que va participar en Un matu. Facer cine dende’l problema, de Rodrigo Agüeria.

Queremos dar les gracies a los trece centros que presentastis la vuestra candidatura, pol tiempu, la confianza y la ilusión depositaos nesta convocatoria. Tamién queremos reconocer el trabayu que yá facéis dende les aules p’abrir nueves formes d’aprendizaxe y participación cultural.

Creyemos nuna escuela que nun solo enseña arte, sinón que deprende al traviés del arte; una escuela abierta a la esperimentación, al pensamientu críticu y al so entornu, capaz de convertise nun espaciu de creación cultural compartida.

El programa ARTE+ESCUELA ta impulsáu por La Benéfica de Piloña en collaboración con LABoral Centro de Arte y Creación Industrial.

Back To Top

Si quieres colaborar con nosotros, conocer más sobre el proyecto o simplemente tienes alguna duda os sugerencia no dudes en ponerte en contacto con nosotres.

¿Dónde estamos?

Plaza la Benéfica
L’Infiestu
33530, Piloña (Asturies)
hola@labenefica.org

¿Alguna duda o incidencia con Amigues con Derecho?
Redes