Cuarto Alcuentru de Folclor de L’Infiestu
Volvemos col
IV Alcuentru
de Folclor
11 y 12 de
setiembre
¡Madre mía, cómo pasa’l tiempu! ¿Quién nos diba dicir que l’Alcuentru de Folclor de L’Infiestu diba llegar yá a la cuarta edición!
La nuestra propuesta, baxar el folclor de los escenarios y disfrutalu na cai, con rondes pelos chigres y les places del pueblu, paez que funcionó, asina qu’esti añu volvemos con dalguna qu’otra novedá.
L’Alcuentru nació con una idea bien cenciella: vivir la música tradicional d’una manera popular, na cai y ente la xente. Prestanos descubrir cómo se canta, se toca y se bailla n’otros llugares, compartir maneres distintes d’entender el folclor y crear un espaciu onde toes elles puedan alcontrase. Nestos últimos años escuchamos, cantamos y baillamos muñeires, verdiales, xotes de tolos tipos, siguiríes, rondeñes, fandangos y pandeiraes… y nesta edición volvemos con una programación qu’esperamos que vos preste tanto como a nosotres.
Vienres 11:
Casa Palma na La Benéfica
Hai un par d’años convidamos a Casapalma al Vermutazu qu’organizamos con Bocanegra y dexáronnos con ganes de más. Esti dúu cántabru tien una manera mui especial d’averase a la música de raíz: con sensibilidá, personalidá y ensin mieu a mecer tradición y electrónica
Casapalma ta formáu por Irene Atienza y Yoel Molina, que sumen más de 15 años d’esperiencia nel sector musical. Depués del reconocimientu algamáu col primer álbum, Montañesas, dan un pasu más na busca sonora y conceptual con JOTAS, el so segundu trabayu (2025, Raso Estudio). JOTAS ye un llaboratoriu nel que Casapalma esplora les llendes de los ritmos y les formes del baille tradicional «a lo suelto», respetando los códigos colos que la panderetera guía a los bailladores. Vamos, que va ser un conciertu pa fartase a baillar.
Por eso fainos muncha ilusión que sean quien inauguren esta cuarta edición de l’Alcuentru de Folclor. Les entraes yá tán a la venta: 10 € la entrada xeneral y 8 € pa les nuestres Amigues con Derechos.
Como siempre, la recaudación del conciertu destínase dafechu a cubrir los costos de producción de l’actividá y a facer posible que l’Alcuentru de Folclor siga medrando edición tres edición.
Sábadu 12:
el folclor vuelve salir de ronda
El sábadu llega’l formatu que yá ye marca de la casa: les agrupaciones convidaes —llegaes d’Asturies y d’otros llugares— entemécense con quien quiera sumase pa percorrer L’Infiestu de chigre en chigre y de plaza en plaza dende les 12 del mediudía.
Esti añu van acompañanos Pan Sen Fron (Pandeireteiras Sen Fronteiros), llegaes dende Galicia, que faen música tradicional con voces, percusión y una enerxía bien mala de contener. Yá tuvieron con nosotres n’Una Señora Fiesta y, sinceramente, teníemos munches ganes de convidales otra vuelta. Son divertidísimes, imprevisibles y especialmente afayaíces pa la nuestra intención d’alteriar moderadamente l’orde públicu a base de panderetes.
También van participar el Grupu Prau Llerón, de Mieres, que va traer al Alcuentru música y tradición asturiana, y Eingo Taldea, de Euskal Herria.
Como nes ediciones anteriores, l’Alcuentru ta abiertu a tol mundu que quiera sumase. Si formes parte d’una agrupación, toques un instrumentu, cantes o bailles —sea de manera profesional, amateur o simplemente porque te presta—, esperamos por ti.
Y si nun toques nengún instrumentu, tampoco tienes escusa. Nel Alcuentru nun fai falta distinguir una xota d’una muñeira en tres segundos, nin saber tolos pasos, nin tener una pandereta en casa. Puedes venir acompañar la ronda, echar unos bailles, cantar cuando t’apeteza o simplemente dexate sorprender mientres tomes una botella de sidra.
Nos próximos díes publicaremos los horarios, el percorríu completu, los chigres participantes y el restu de detalles de la programación. De xuru que los collacios de La Maléfica tamién nos preparen daqué especial.
¡Ven, que te va prestar de xuru!
El IV Alcuentru de Folclor recibe esti añu l’apoyu de la Conseyería de Cultura del Principáu d’Asturies, de la convocatoria de proyectos culturales d’interés rexonal, que cubre’l 50 % de los costos totales del proyectu.
