¡Yá ta equí otru branu! Fainos muncha ilusión anunciavos que ta too preparáu pa tornar al Antiguu Balneariu de Borines col Mercáu d’Arte, un proyeutu que cada añu crez un poquiñín más gracies a vosotres.

Convidámosvos a la inauguración el domingu 2 d’agostu, a les 12h, con un vermú musical de la mano de WyllyW pa entamar como se merez: con música, con reencuentros y alcuentros nuevos, y con obres pa almirar con calma. Y, cómo non, tamién tará con nosotres otra vegada más Setadebosque, que va traenos platos pensaos alredor de la seta shiitake, cultivada equí mesmo, na zona.

¿Y qué ye esto del Mercáu d’Arte, esactamente? Nun somos nin queremos ser galeristes. Lo que proponemos ye qu’artistes de llinguaxes bien diversos —pintura, escultura, textil y otros formatos y materiales— puedan amosar el so trabayu, y que cualquier persona pueda acercase a descubrilu. Lo importante ye que seya accesible de verdá: precios pa tolos bolsos, porque pa nosotres l’arte nun pue ser un lluxu reserváu pa unos pocos.

Esti añu repetimos la convocatoria pública, yá per segunda vegada, pa qu’artistes interesaes pudieren presentar les sos propuestes. Y volvió ser un ésitu: llegáronos obres auténtiques, comprometíes, cargaes d’espresión, y tamos deseando compartiles con vosotres.

Cada pieza que se vende apoya direutamente a quien la fizo, pero tamién suma al proyeutu colectivu de La Benéfica: un porcentaxe de lo recaudao destínase a siguir equipando l’antiguu teatru yá rehabilitáu y a sostener les actividaes y la vida que-y damos al conceyu. Gracies, de corazón, a tolos vecinos y les vecines que quisisteis sumavos.

De momentu guardamos en secretu quién son les artistes participantes, porque queremos que les descubráis en persona, que vos dexéis sorprender poles sos obres y que faléis con elles direutamente.

Amás de la inauguración, tamos entamando más actividaes pa los fines de selmana d’agostu, asina que tar atentes a les nueses redes y a la axenda de la web pa nun perder nada.

Un últimu apunte importante: Borines ye un pueblu pequeñu, fae casu a l’organización p’aparcar. Cuida a les vecines. Ayudáinos a curiar a les vecines y vecinos del llugar, pa que’l Mercáu siga siendo una fiesta pa toos y toes, tamién pa quien vive ellí tol añu.