Vamos a la gueta
Información y requerimientos básicos pa dir a
pañar castañes con nós el prósimu domingu, 22 d’ochobre.
¡Qué hai, veceros y veceres de La Benéfica! Tamos ultimando los preparativos de l’actividá de senderismu críticu que vamos entamar esti fin de selmana alredor de les castañes. Yá vos dimos adelantu d’ello hai unos díes d’esta actividá, pero queríamos aprovechar esti espaciu, un poco más sosegáu que’l de les redes sociales, pa da-vos una pinceladina más de too ello.
Nesti testín vamos falavos del porqué d’esta actividá y de los requerimientos básicos que sería preciso cumplir pa participar nella.
Entamu
Esti añu, enxunto coles collacies de Les Ablanes, tuvimos la idea de da-y una vueltina al formatu del magüestu, esa fiesta que tan descontestualizadamente vivimos munches veces. Pa tratar de reconciliar un poco esa separación que tanto se da, ente la celebración d’una fiesta que tenemos por tradicional y les xeres tradicionales que sostienen esa mesma fiesta, ocurriósenos facer una actividá previa a la del propiu magüestu. Lo que se mos ocurrió, novedá d’esti añu –pero que venimos faciendo dende siempre–, nun ye nin más nin menos que la de dir a la gueta: dir pañar a comuña les castañes que lluéu diremos a amagostar y comer na fiesta del magüestu del domingu, 5 de payares de 2023.
¿Por qué facemos esto?
Cuando mos punximos a pensar nel magüestu d’esti añu, una de les coses de les que mos fuimos dando cuenta ye qu’hai un fenómenu que se da dacuando nes fiestes tradicionales de la seronda: esta «gran división» ente’l trabayu y la fiesta comunitarios. Decatámonos d’esto pensando na fiesta del amagüestu, pero enseguida salieron otres munches –sidre, samartín, ablanes, maíz, etc.– nes que vemos cómo esi fenómenu d’encaxonamientu de la celebración tradicional dientro de los esquemes urbanos del ociu consumista se repiten una y otra vez. Nun mos tenemos por sabedores espertos, pero sí tuvimos la suerte de sentir nesti intre les voces de muncha xente mayor, testigxs d’otru tiempu, que mos falaron de cómo les fiestes tamién puen desurdir como una prolongación del trabayu comunitariu. ¿Qué hai? ¿Qué otra cosa podría haber, revolviendo nesti umbral, nesti llímite ente trabayu y fiesta?
¿Cómo lo vamos facer?
Pañando, ensín más: nadie sabe lo que pue’l dir a la gueta, y ye esi puntu d’incertidumbre col que querríamos trabayar. Paeznos que una bona manera de recomponer esa rellación ente trabayu y fiesta ye entamar asina: diendo a la gueta, ensín más. Vamos concede-y a esta xera, a esta práctica tan alcance de cualesquiera, tan discreta, el poder d’orientar les nueses aiciones, de ser puntu de partida y dar pie a qu’otres aiciones puedan asoceder. Otramanera, quisieramos aprovechar el camuflax que mos da tar nel mediu d’esti testín pa contavos un secretu. Donna Haraway y Ursula K. Le Guin confirmáronmos la so asistencia: van venir con nós a pañar, n’esclusiva, como aparición única n’Asturies. Pues como elles mesmes nos comunicaron, importen les coses que facemos pa facer dempués otres coses con elles; y importa, claro ta, qu’entamemos la producción d’un eventu diendo al monte a pañar.
Como actividá de senderismu críticu, la idea va ser tamién danos la oportunidá poner en común les inquietudes que podamos tener: dexar que la curiosidá desurda colectivamente, afondar en dalgún aspectu que vaiga apaeciendo y ellaboralu a comuña, facer un analís situáu, etc.; too ello col enclín de volvenos más capaces de rellacionanos activamente col monte, y de ver qué otres aiciones podríamos entamar a desenvolver. Amás de guetar castañes a comuña, quienes entamamos esto tamos particularmente interesaxs n’entruganos por cómo pasar d’una situación d’abandonu del monte, de descuidu, a un horizonte de reparación ecolóxica que pudiéramos contribuir a desendolcar. Ye por ello que, p’arriquecer esti percorríu de senderismu críticu, vamos contar tamién col sofitu d’un gran amigu de Les Ablanes y de La Benéfica, Xuan Piloñeta, investigador de la Fundación Belenos, y que dinamizará l’aición.
Requerimientos
Encamiéntase a toles participantes que, por favor, vengan con:
- Ropa y calzáu cómodo, afayadizo p’andar pel monte;
- Ropa d’agua –chubasqueru–;
- Fardela o cestu pa guardar castañes;
- Guantes pa nun se mancar colos pinchos de los aricios;
- Dalgo de comida pa manducar.
Saldremos a les 10 en puntu de la Plaza de L’Infiestu. Pa Facilitar les xeres d’organización y loxística prestaríanos encamientámosvos a que vos anoteis, por favor, nesta fueya enantes del sábadu 21 a les 12 hores:
