Nun se fizo La Benéfica nuna hora
Ya fai un añu que zarramos La Benéfica pa entamar les obres, nun vos fuimos contando muncho pa nun estropiavos la sorpresa, pero yá va siendo hora de contavos un poquiñín como foi tol procesu. Esta segunda fase d’obres ye una fase de trabayos d’instalaciones y acondicionamientu interior.
Lo primero que se fizo foi rematar canalones y baxantes pa dar como acabaos los trabayos de la cubierta que se reconstruyó na primer fase.
En mayu anduvimos desmontando ventanes pa tapiales, pela parte del escenariu tapáronse toles ventanes pa convertiles en güecos d’almacenamientu útiles na escena. Alredor de los pilares que queden na nave, recolocaos yá na primer fase, dexamos un güecu que va sirvir pa ver la estructura antigua y tamién pa ventilar la cimientación, que son bien susceptibles de vese atacaos pola humedá.
Amás de los trabayos físicos, restaurar l’edificiu llévanos munchu esfuerzu mental y burocráticu, a veces casi nos sal fumu de les cabeces
El veranu dedicámoslu a dexar peracabada la estructura del escenariu, gracies al llabor de los nuestos carpinteros de confianza, quedó perguapu, bien cubiertu y insonorizáu.
Tamién rematamos la restauración de los pilares, la instalación eléctrica y de fontanería pa los baños y la barra provisional, amás de les conexones y instalaciones de saneamientu.
Y hasta nos tiempu a facer, con Macario y otros collaboradores a los que tamos mui agradecíes polo so sofitu, el segundu bañu pa persones con movilidá reducida, fechu con técniques de construcción tradicional asturiana dafechu y biomateriales.
Na seronda, pudimos pocu a pocu terminar la caxa escénica, cubriendo de madera negro tol escenariu, ¡esto yá ye otra cosa!
Hoi día, yá tenemos les paredes aisllaes y recubiertes con pladur, tamos pendientes de facer el suelu y acabar de rematar la restauración de los arcos de la entrada, que van quedar perguapos y mui paecíos a la construcción orixinal.
Nun queríemos dexar d’agradecer a les nuestres amigues con derechu, ensin elles nun llegábamos tan lloñe, gracies, gracies, gracies!
La nuestra idea ye rematar tou pa finales de xineru, siguimos contándovos. Tamos cumpliendo un suañu colectivu que tresciende xeneraciones, y nun queremos dexar de compartir toa esta ilusión.
