Pasaos unos díes del espectáculu de Bewis de la Rosa’l pasáu día 3 de xunetu na Benéfica de Piloña, sigo plasmada cola fuercia d’esta muyer. Una muyer que tien muncha miga…manchega, por supuestu, pero tamién universal pola importancia del mensaxe recoyíu nes sos lletres enllenes de simboloxía. Y amás presentáu con una estética natural y cuidada, guapa como una flor.

Asina véola yo, como una flor del campu: una flor cenciella, pero tamién colorida p’atraer l’atención sobre temes tan importantes como l’escaecimientu de la cultura tradicional, el feminismu o la xusticia social; la reivindicación de lo rural, lo antiguo, lo que perdura frente a lo pasaxero, lo trendy, lo d’usar y tirar. Lo tradi y lo actual amestaos col aroma dulce de les flores y toques especiaos d’humor.

Munchu humor. Y munches flores.

Sí, compañerines: les flores faen actu de presencia yá dende’l primer  minutu del recital, cuando pudimos vela abriéndose pasu ente’l públicu pedaliando nuna especie de triciclu adornáu colos xirasoles y margarites que protagonicen sobre manera l’imaxinariu rural de l’artista, y que díbemos atopar compartiendo l’escenariu con botiyos, tapetinos de los de tola vida, mandiles, bolses pal pan, fotos antigües, colches de puntu o cuyarones de madera (axeitaos con fervor feminista reivindicativu).

Too ello llevónos ensin remediu a un llugar ancestral y atemporal: l’Hogar en la Linde, títulu del so nuevu trabayu. Inconformista, aldeanu, domésticu y con golor a yerba segao y flores como les que cayeron nuna lluvia de pétalos sobre la cantante asturiana Marisa Valle Rosso, cuando intervino pa collaborar cola manchega nún de los meyores momentos de l’actuación.

Bewis de la Rosa mostró nel so directu la madurez artística que yá intuíamos nos trabayos publicaos, non sólo pola puesta n’escena, o la complicidá col públicu, sinón pola calidá del conciertazu, a mediu camín ente la música y la performance, ente l’alcordanza y la poesía o ente’l manifiestu y la tenrura.  Inclasificable, como la propia intérprete.  Y ye que definila namás como “rapera rural” ye quedase mui corta, porque esta rapaza ye rapera, actriz, coreógrafa, investigadora, profesora de danza, poeta y escritora (y probablemente mil coses más que nun recuerdo).

Pero, indefiniciones aparte, la cuestión ye que dexó tremando la Benéfica, con un públicu entregadísimu y obediente que siguió ciegamente les sos instrucciones coreográfiques, cuando l’artista decidió que naide podía marchar d’ellí ensin saber baillar una xota…

Un públicu que bebió l’agua bendito (bendito porque apagó la sede de gran parte del respetable) del botiyu que Bewis ofreció a diestro y siniestro…

Un públicu que corió al altu la lleva qué bonita la amapola cuando sale…

Un públicu que, al final, nun quería marchar. O sí quería, (como yera’l mio casu), pero llevando a Bewis pa la so casa…pa con ellos.

Crónica La Benéfica x Bewis de la Rosa
del 3 de xunetu por Bea G. Doral

*Esta crónica ta escrita n’asturianu y nun na
versión castellana por respetar la versión orixinal»