Una lluz azulada alluma l’escenariu la Bene, y apaecen ellos, Irene Atienza (voz) y Yoel Molina (guitarra y producción): CASAPALMA. Visten con tonos coloraos vivos que rellumen sobro l’azul escuro como fueu na nueche. Ella lleva corales llamativos y una sonrisa preciosa.

Casapalma ye’l nome de la casa familiar d’Irene nel Valle Cabuérniga, y nos dos discos yá espublizaos resona l’ecu de tolos  cantares sentíos neses muries. Dacuando lliteralmente, porque les grabaciones qu’apaecieron la otra nueche nel conciertu son fragmentos de cintes grabaes a los güelos d’ Irene y otros familiares.

Pero’l dúu, que nació tres la pandemia, nun va conformase con recoyer o interpretar eses xotes montañeses o llixeros atrapaos nes cintes, nin otros recoyíos per tola xeografía cántabra, sinón que con munchu mimu y un gustu esquisitu, van amestar estes ayalgues tradicionales cola música electrónica, respetando la estructura pal baille na mayoría les pieces, y poniendo’l so sellu personal pa llograr un soníu elegante y únicu. Reconocible dende lloñe pa les sos fans, ente les que m’alcuentro.

Xuntando too esto, foi difícil nun esfrutar cola segunda (o tercer, que yá perdí la cuenta) actuación de los cántabros en Piloña, porque pudimos baillar hasta romper los zapatos, hasta que nos dolió tol cuerpu y hasta acabar azotaes per cualesquier llau, al ritmu la pandereta d´Aurelio, qu’acompañaba al dúu nesta ocasión. Berremos y cantemos hasta quedar ensin voz Como el Agua de Limón, Amores de Largo Tiempo o’l Trepeletré y vivimos extasiaes la collaboración de Nacho Prada (cantante del grupu burgalés El Nido) nel llixeru Ser grande siendo pequeño, que grabaron xuntos esti añu. Maraviya.

Y, sí, a la fin de la nueche, quedóme clara una cosa: la calidá del dúu ye cada día más incuestionable. Y que lo pasemos podre, tamién. Avisáime cuando vuelvan, por favor.

Crónica La Benéfica x Bewis de la Rosa
del 3 de xunetu por Bea G. Doral

*Esta crónica ta escrita n’asturianu y nun na
versión castellana por respetar la versión orixinal»