{"id":21976,"date":"2026-10-02T09:30:00","date_gmt":"2026-10-02T07:30:00","guid":{"rendered":"https:\/\/labenefica.org\/?p=21976"},"modified":"2026-09-30T17:50:56","modified_gmt":"2026-09-30T15:50:56","slug":"flor-rapera","status":"publish","type":"post","link":"https:\/\/labenefica.org\/ast\/flor-rapera\/","title":{"rendered":"Flor rapera"},"content":{"rendered":"\t\t
\n\t\t\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t

Pasaos unos d\u00edes del espect\u00e1culu de Bewis de la Rosa\u2019l pas\u00e1u d\u00eda 3 de xunetu na Ben\u00e9fica de Pilo\u00f1a, sigo plasmada cola fuercia d\u2019esta muyer. Una muyer que tien muncha miga\u2026manchega, por supuestu, pero tami\u00e9n universal pola importancia del mensaxe recoy\u00edu nes sos lletres enllenes de simbolox\u00eda. Y am\u00e1s present\u00e1u con una est\u00e9tica natural y cuidada, guapa como una flor.<\/p>\n

Asina v\u00e9ola yo, como una flor del campu: una flor cenciella, pero tami\u00e9n colorida p\u2019atraer l\u2019atenci\u00f3n sobre temes tan importantes como l\u2019escaecimientu de la cultura tradicional, el feminismu o la xusticia social; la reivindicaci\u00f3n de lo rural, lo antiguo, lo que perdura frente a lo pasaxero, lo trendy, lo d\u2019usar y tirar. Lo tradi y lo actual amestaos col aroma dulce de les flores y toques especiaos d\u2019humor.<\/p>\n

Munchu humor. Y munches flores.<\/strong><\/p>\n

S\u00ed, compa\u00f1erines: les flores faen actu de presencia y\u00e1 dende\u2019l primer  minutu del recital, cuando pudimos vela abri\u00e9ndose pasu ente\u2019l p\u00fablicu pedaliando nuna especie de triciclu adorn\u00e1u colos xirasoles y margarites que protagonicen sobre manera l\u2019imaxinariu rural de l\u2019artista, y que d\u00edbemos atopar compartiendo l\u2019escenariu con botiyos, tapetinos de los de tola vida, mandiles, bolses pal pan, fotos antig\u00fces, colches de puntu o cuyarones de madera (axeitaos con fervor feminista reivindicativu).<\/p>\n

Too ello llev\u00f3nos ensin remediu a un llugar ancestral y atemporal: l\u2019Hogar en la Linde,<\/em>t\u00edtulu del so nuevu trabayu. Inconformista, aldeanu, dom\u00e9sticu y con golor a yerba segao y flores como les que cayeron nuna lluvia de p\u00e9talos sobre la cantante asturiana Marisa Valle Rosso, cuando intervino pa collaborar cola manchega n\u00fan de los meyores momentos de l\u2019actuaci\u00f3n.<\/p>\n

Bewis de la Rosa mostr\u00f3 nel so directu la madurez art\u00edstica que y\u00e1 intu\u00edamos nos trabayos publicaos, non s\u00f3lo pola puesta n\u2019escena, o la complicid\u00e1 col p\u00fablicu, sin\u00f3n pola calid\u00e1 del conciertazu, a mediu cam\u00edn ente la m\u00fasica y la performance, ente l\u2019alcordanza y la poes\u00eda o ente\u2019l manifiestu y la tenrura.  Inclasificable, como la propia int\u00e9rprete.  Y ye que definila nam\u00e1s como \u201crapera rural\u201d ye quedase mui corta, porque esta rapaza ye rapera, actriz, core\u00f3grafa, investigadora, profesora de danza, poeta y escritora (y probablemente mil coses m\u00e1s que nun recuerdo).<\/p>\n

Pero, indefiniciones aparte, la cuesti\u00f3n ye que dex\u00f3 tremando la Ben\u00e9fica, con un p\u00fablicu entregad\u00edsimu y obediente que sigui\u00f3 ciegamente les sos instrucciones coreogr\u00e1fiques, cuando l\u2019artista decidi\u00f3 que naide pod\u00eda marchar d\u2019ell\u00ed ensin saber baillar una xota\u2026<\/p>\n

Un p\u00fablicu que bebi\u00f3 l\u2019agua bendito (bendito porque apag\u00f3 la sede de gran parte del respetable) del botiyu que Bewis ofreci\u00f3 a diestro y siniestro\u2026<\/p>\n

Un p\u00fablicu que cori\u00f3 al altu la lleva qu\u00e9 bonita la amapola cuando sale\u2026<\/em><\/p>\n

Un p\u00fablicu que, al final, nun quer\u00eda marchar. O s\u00ed quer\u00eda, (como yera\u2019l mio casu), pero llevando a Bewis pa la so casa\u2026pa con ellos.<\/p>\n

Cr\u00f3nica La Ben\u00e9fica x Bewis de la Rosa<\/span><\/i><\/span>del 3 de xunetu por Bea<\/span>G. Doral<\/em><\/span><\/p>\n

*Esta cr\u00f3nica ta escrita n’asturianu y nun naversi\u00f3n castellana por respetar la versi\u00f3n orixinal”<\/em><\/p>\t\t\t\t\t\t\t\t<\/div>\n\t\t\t\t<\/div>\n\t\t\t\t

\n\t\t\t\t
\n\t\t\t\t\t\t\t
\n\t\t\t\n\t\t