¡Sintoniza Radio Barullu!
Yá teníamos munches ganes de compartir con vosotres que… ¡en xineru arranca Radio Barullu! Llevamos dende ochobre pensando y probando ¡ún, dos, tres! esti proyectu de mediación cultural nuevu qu’impulsamos dende La Benéfica de Piloña en collaboración cola Fundación “la Caixa” gracies a la Convocatoria Acción Social nel ámbitu rural.
¿Qué ye Radio Barullu?
Sí, lleístilo bien. La Benéfica yá tien la so propia radio, pero queremos que sea un espaciu abiertu pa encontranos y compartir.. Si yá t’interesaba Piloña y queríes enterate de lo que pasaba n’Asturies, agora namás lo que tienes que facer ye entrar na web de Radio Barullu y escuchar los nuestros programes. Si vives per Piloña o la redolada y quies que la to voz suene, puedes escribinos o ven a venos pa participar.
Radio Barullu ye una radio comunitaria que tresmite dende’l pueblu de L’Infiestu.. Somos una radio pa escuchar en casa o en coche, pero sobre too queremos ser una radio onde puedas venir a charrar de les tos coses, a investigar, a crear y a armar bien de barull
Programa Selmanal
Somos como una conversación de chigre, y por eso puedes alcontrar el nuestru estudiu nel chigre La Maléfica, dende onde tresmitimos el programa selmanal, qu’a la xente de Piloña pásen-yos munches coses tolos díes.
Va haber entrevistes a asociaciones del conceyu, una axenda cultural pa tar al día de tola programación y secciones con persones invitaes especiales. En fin, que vamos meter ruíu.
Y muncho más...
Pe amás del ruíu, en Radio Barullu facemos munches coses más.
Pa escomencipiar, tamos collaborando con La Bienal Climática, una bienal d’arte y clima que va facese per primera vegada nel 2026 n’Avilés. Qué tien que ver una bienal con una radio comunitaria, tais entrugándovos… Pues paecíanos que yera una oportunidá pa entamar a facer
proyectos artísticos en centros educativos alredor del tema de la crisis climática.. En payares empezamos a collaborar col CEIP L’Ablanu, l’IES Infiestu y el CRA La Coroña pa llevar alantre tres proyectos d’arte y educación que toquen temes como la relación humana cola naturaleza con xuegos simbólicos, la memoria obrera dende los paisaxes industriales asturianos o la relación del maíz colos personaxes de celebraciones como l’antroxu. Ta siendo un procesu bien especial del que bien llueu van salir radioficciones, paisaxes sonoros y docuficciones gracies a la collaboración de tres artistes asturianes que vinculen la práctica a la crisis climática y lo comunitario.
Tamién vamos a empezar a facer talleres y formación de radio y arte sonoru pa toles edades. Vamos convidar a profesionales d’Asturies y redolada pa que compartan esperiencies y aprendizaxes alredor de la radio dende la creatividá y la participación. Vamos aprender a diseñar un podcast o a escribir una radioficción. Esperimentar cola radio, la música y el soníu. Esperimentar cola radio, la música y el soníu. Vamos esplorar na nuestra cultura sonora y crear conteníos nuevos. Nun puedes perdelo.
Pa rematar, y magar que tovía queda un poco pa eso, vamos a llanzar una residencia de podcast pa xente mozo en collaboración con La Casa de Les Radios de Bimenes y LABoral de Xixón.. De xuru que sabes munchísimo d’un tema que namás t’interesa a ti o lleves tiempu con ganes de xuntate con dalguién pa comentar les tos vivencies alredor d’un tema concretu. Por eso, queremos ofrecer un espaciu y un tiempu pa que puedas amañar el to proyectu personal y compartilu col restu d’oyentes. Vamos davos anuncies sobre esta residencia bien llueu…
Munches gracies por lleer hasta equí. Pa tar al día y nun perder nada, vamos convidate a visitar la nuestra web radiobarullu.com y siguinos en redes sociales @radiobarullu
