LA BENÉFICA X
SAMANTHA HUDSON

Yá sabéis que en La Benéfica somos unes namoraes del amor. Somos fáciles, namoradices, llixeres, como queráis llamalo. Hai, amás, propuestes artístiques que nos enllenen y nos emocionen, que queremos que vengan a L’Infiestu pa que podamos disfrutales nel nuestru queríu teatru.

¿Y cómo nun vamos quedar prendaes de Samantha Hudson? Cainos la baba con esta artista y iconu 360 de la xeneración Z. Una auténtica mocatriz: cantante, compositora, productora, guionista, actriz y tolo que-y pete.

Actualmente ta de xira col tercer álbum, “Música para Muñecas” (Subterfuge 2025), y tenemos la suerte de qu’una de les paraes sea nel nuestru teatru. Esta musa de pelirrubia rinde homenaxe a la comunidá LGBTIQ+ con un discu demoledor que narra les esperiencies d’una disidente del xéneru que persigue los sos suaños na gran ciudá.

Siguiendo la estela de les anteriores propuestes, “Música Para Muñecas” ufierta un soníu evolucionáu, enllenu de reminiscencies de la música club, hard-tech, acid y bakala, ente otros xéneros musicales, la so rapidez contrasta cola fondura d’unes lletres que traten temes como la precariedá, el fracasu y el síndrome de la impostora.

“Música Para Muñecas ye un diariu personal en clave d’electrónica que fala del fracasu, del ésitu, del síndrome de la impostora, de la disforia y l’euforia de xéneru, de la inmediatez que la industria esixe, del pesu d’una existencia cada vez más hostil y un pocu tamién de la inclemencia de les grandes urbes, de tratar de construyir la to identidá nun mundu que cai a cachos y onde paez que, más que construyir, la norma ye destruyir y esbarrumbar”

Acompáñanos a perder les formes con esti álbum dedicáu a toles que viven ensin pidir permisu nin perdón.