LA BENÉFICA X
BEWIS DE LA ROSA

Yá sabéis que en La Benéfica tamos namoraes del amor. Somos fáciles, namoradices, llixeres, como queráis llamanos. Hai, amás, propuestes artístiques que nos enllenen y nos emocionen, que queremos que vengan a L’Infiestu pa poder disfrutales nel nuestru queríu teatru.

Bewis de la Rosa revolvió col so cuyarón toles meses de la escena independiente dende que, en febreru del 2023, completaba la salida del so álbum de debut Amor más que nunca, onde desenvuelve’l conceptu de Rap Rural.
Un directu conmovedor, un zafarranchu, un torbellín nel escenariu llevando como bandera les bragues de so güela, semando amor, tradición, raigañu, comunidá y disfrute, de la mano d’una propuesta performativa de gran calidá humana y artística.

Observamos un universu artísticu con referencies clares a la tradición castellana, onde música, danza y performance s’entellacen. Col soníu del productor musical G. Rams, atopamos elementos del rap, el ḥip-ḥop, la música llatina y el folclor, con unes lletres cargaes de discursu. Apaecen el pensamientu críticu, la importancia del accesu a la tierra, l’autosuficiencia, el descrecimientu, la firida histórica y la salú mental, alimentando col so cuyarón a la humanidá y defendiendo l’amor como motor de la tresformación.

Killaphonía piesllará la nueche tres el conciertu de Bewis de la Rosa. La so música ye conexión, diversidá y espansión. Nos sos sets, Killaphonia mestura lo folklórico colo electrónico, lo tribal colo urbano, voces étniques con ritmos orgánicos. Una propuesta sonora que flúi ente atmósferes tradicionales, electróniques y ecléctiques, diluyendo’l tiempu en ritmu y emoción. Una invitación a festexar el final de la nueche baillando dende’l raigañu.